Patay ang usa ka 19-anyos nga estudyante human na sideswipe sa usa ka Van samtang naglingkod sa iyang nakaparadang motorsiklo sa kilid sa kalsada sa Sitio San Agustin, Barangay Del Monte, Island Garden City of Samal, Davao del Norte, niadtong nakalabay nga adlaw.
Giila ang biktima nga si Rodel Fajardo, residente sa maong lugar. Sumala sa imbestigasyon sa kapulisan, ang Van nga gimaneho ni Virgilio Clopino Jr., 35 anyos, taga Panacan, Davao City, kalit lang nawad-an og kontrol tungod sa giingong brake malfunction, samtang nagnabigar sa usa ka kurbada padulong sa ubos nga parte sa dalan sa Barangay Kinawitnon.
Kauban sa drayber ang iyang asawa nga si Elvie Clopino, 43 anyos, ug ilang anak nga si Audrey Clopino, 15 anyos, nga parehong na-angol uban sa drayber. Matud pa sa report, ang van misirit matud pa sa tuo ug nadasmagan si Fajardo nga naglingkod sa iyang Yamaha mio nga motorsiklo. Ang biktima ug mga pasahero sa Van naka-angkon sa pangos ug bun-og sa nagkadiyang parte sa kalawasan.
Girespondehan gilayon sa mga personahe sa City Disaster Risk Reduction and Management Council-IGACOS ug gidala ang tanan nga samdan sa Davao del Norte Hospital IGACOS-Zone, apan giideklarar nga Dead on Arrival si Fajardo tungod sa traumatic brain injury, sumala sa attending physician.
Nagpabilin karon ang mga samaran nga pasahero ug ang drayber sa ospital samtang ang patay gipahaluna sa Funeral Homes sa IGACOS. Anaa na sa kustodiya ang sakyanan ug mga dokumento sa kapulisan alang sa tukmang lakang.
Photo for illustration crerdits to:adobe stock
